And also an oþer maner meued him eke, Þat he þurȝ nobelay had nomen he wolde neuer ete Upon such a dere day er hym deuised were Of sum auenturus þyng… - Pearl poet

The dubbement dere of doun and daleȝ,
Of wod and water and wlonk playneȝ,
Bylde in me blys, abated my baleȝ,
Fordidden my stresse, dystryed my payneȝ.
Doun after a strem þat dryȝly haleȝ
I bowed in blys, bredful my brayneȝ;
Þe fyrre I folȝed þose floty valeȝ,
Þe more strenghþe of ioye myn herte strayneȝ.

Bi a mounte on þe morne meryly he rydes
Into a forest ful dep, þat ferly watz wylde,
Hiȝe hillez on vche a halue, and holtwodez vnder
Of hore okez ful hoge a hundreth togeder;
Þe hasel and þe haȝþorne were harled al samen,
With roȝe raged mosse rayled aywhere,
With mony bryddez vnblyþe vpon bare twyges,
Þat pitosly þer piped for pyne of þe colde.

Dubbed wern alle þo downeȝ sydeȝ
Wyth crystal klyffeȝ so cler of kynde.
Holtewodeȝ bryȝt aboute hem bydeȝ
Of bolleȝ as blwe as ble of Ynde;
As bornyst syluer þe lef on slydeȝ,
Þat þike con trylle on vch a tynde.
Quen glem of glodeȝ agaynȝ hem glydeȝ,
Wyth schymeryng schene ful schrylle þay schynde.