Luf lokez to luf & his leue takez, For to ende alle at onez & for euer twynne. By forty dayez wern faren, on folde no flesch styryed. - Pearl poet

Bi a mounte on þe morne meryly he rydes
Into a forest ful dep, þat ferly watz wylde,
Hiȝe hillez on vche a halue, and holtwodez vnder
Of hore okez ful hoge a hundreth togeder;
Þe hasel and þe haȝþorne were harled al samen,
With roȝe raged mosse rayled aywhere,
With mony bryddez vnblyþe vpon bare twyges,
Þat pitosly þer piped for pyne of þe colde.

After crystenmasse com þe crabbed lentoun
Þat fraystez flesch wyth þe fysche and fode more symple.
Bot þenne þe weder of þe worlde wyth wynter hit þrepez,
Colde clengez adoun, cloudez vplyften,
Schyre schedez þe rayn in schowrez ful warme,
Fallez vpon fayre flat, flowrez þere schewen,
Boþe groundez and þe greuez grene ar her wedez,
Bryddez busken to bylde, and bremlych syngen
For solace of þe softe somer þat sues þerafter
Bi bonk.

Dubbed wern alle þo downeȝ sydeȝ
Wyth crystal klyffeȝ so cler of kynde.
Holtewodeȝ bryȝt aboute hem bydeȝ
Of bolleȝ as blwe as ble of Ynde;
As bornyst syluer þe lef on slydeȝ,
Þat þike con trylle on vch a tynde.
Quen glem of glodeȝ agaynȝ hem glydeȝ,
Wyth schymeryng schene ful schrylle þay schynde.