Fro Philip the Valais was sir David sent All Ingland to win fro Twede unto Trent - Laurence Minot

Whare er ye, Skottes of Saint Johnes toune?
The boste of yowre baner es betin all doune;
When ye bosting will bede, sir Edward es boune
For to kindel yow care and crak yowre crowne:
He has crakked yowre croune, wele worth the while;
Schame bityde the Skottes, for thai er full of gile

Men may rede in romance right
Of a grete clerk that Merlin hight;
Ful many bokes er of him wreten,
Als thir clerkes wele may witten;
And yit in many prive nokes
May men find of Merlin bokes.

In this dale I droupe and dare
For dern dedes that done me dere.
Of Ingland had my hert grete care
When Edward founded first to were.
The Franche men war frek to fare
Ogaines him with scheld and spere,
Thai turned ogayn with sides sare,
And al thaire pomp noght worth a pere.