Neque enim tantum id dico, eum qui sit orator virum bonum esse oportere, sed ne futurum quidem oratorem nisi virum bonum. Nam certe neque intellegentiam concesseris iis qui proposita honestorum ac turpium via peiorem sequi malent, neque prudentiam, cum in gravissimas frequenter legum, semper vero malae conscientiae poenas a semet ipsis inproviso rerum exitu induantur.

Quid ergo? non ibo per priorum vestigia? ego vero utar via vetere, sed si propiorem planioremque invenero, hanc muniam. Qui ante nos ista moverunt non domini nostri sed duces sunt. Patet omnibus veritas; nondum est occupata; multum ex illa etiam futuris relictum est.

Non est miserum esse caecum, miserum est caecitatem non posse ferre.

Omne verum a quocumque dicatur a Spiritu Sancto est.

Pauperibus vates ego sum, quia pauper amavi;
Cum dare non possem munera, verba dabam.

Non possunt primi esse omnes omni in tempore.
summum ad gradum cum claritatis veneris,
consistes aegre et citius quam ascendas cades.
cecidi ego, cadet qui sequitur: laus est publica.

Sic ego nec sine te nec tecum vivere possum.

Non enim omnis error stultitia est dicenda.

Saepe aliud volumus, aliud optamus, et verum ne dis quidem dicimus.

Emas non quod opus est, sed quod necesse est. Quod non opus est, asse carum est.

Adeo nihil est miserum nisi cum putes, contraque beata sors omnis est aequanimitate tolerantis.

Non privatim solum sed publice furimus. Homicidia conpescimus et singulas caedes: quid bella et occisarum gentium gloriosum scelus? Non avaritia, non crudelitas modum novit. Et ista quamdiu furtim et a singulis fiunt minus noxia minusque monstrosa sunt: ex senatus consultis plebisque scitis saeva exercentur et publice iubentur vetata privatim. Quae clam commissa capite luerent, tum quia paludati fecere laudamus. Non pudet homines, mitissimum genus, gaudere sanguine alterno et bella gerere gerendaque liberis tradere, cum inter se etiam mutis ac feris pax sit. Adversus tam potentem explicitumque late furorem operosior philosophia facta est et tantum sibi virium sumpsit quantum iis adversus quae parabatur acceserat.

Nihil enim malo quam et me mei similem esse et illos sui.